منتدى التربية المسرحية
منتدى الذوق الرفيع يدعوك ان تكون ضمن اسرتنا وشارك معنا كى نتعلم منك *فى الشعر *والمسرح والادب واهلا بك


لاخصائى التربية المسرحية بادارة قطور التعليمية وكل من يحب المسرح
 
الرئيسيةالبوابةاليوميةس .و .جبحـثالأعضاءالمجموعاتالتسجيلدخول
استغفر الله العظيم من كل ذنب اذنــبــــتـــه و من كل فرض تركـــــتــه و من كل انسان ظلـمـتــــه , أستغفر الله العظيم الذي لا إله الا هو الحي القيوم وأتوب إليه
تنوية : الاعضاء الذين لم يستطيعوا تفعيل عضويتهم  سيتم تفعيل العضوية من المنتدى مباشرة وما عليك الا الدخول بالاسم والباسورد الخاص بك. مع تحيات الادارة ونرحب بكل اقتراحاتكم للنهضة بالمنتدى  **** ترحب ادارة المنتدى بكل الاعضاء الجدد الذين اشتركوا معنا وادارة المنتدى على اتم الاستعداد للرد والمشاركة فى اى موضوع  او استفساريخص المسرح


شاطر | 
 

 محتاجه حد يساعدني

اذهب الى الأسفل 
كاتب الموضوعرسالة
Nody



عدد المساهمات : 3
نقاط : 5
تاريخ التسجيل : 08/03/2016

مُساهمةموضوع: محتاجه حد يساعدني   الجمعة مارس 11, 2016 10:44 am

السلام عليكم معلش انا اول مره ادخل هنا ولسه جديدة فمش عارفه اسال فين
انا مطلوب مني اكتب سيناريو مسرحيه هي للاطفال بس محتجاها تكون فيها ترفيه
موضوعها مواقف الي كانت بتحصل زمان ودلوقتي في المدرسه وندخل فيها الحسد
يعني مثلا موقف الطفل يدخل يقول هاي وكدا دا دلوقتي وزمان كان بيعمل ايه
معلش انا عارفه ان كلامي متلغبط بس محتاجه مساعدة ولو فصل وانا اكمل
وشكرا ليكم اوي
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
Nody



عدد المساهمات : 3
نقاط : 5
تاريخ التسجيل : 08/03/2016

مُساهمةموضوع: رد: محتاجه حد يساعدني   السبت مارس 12, 2016 7:50 pm

افيدوني من فضلكم
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
صلاح
Admin
avatar

عدد المساهمات : 436
نقاط : 1001
تاريخ التسجيل : 07/11/2009

مُساهمةموضوع: رد: محتاجه حد يساعدني   الأحد مارس 13, 2016 5:43 pm

ممكن حاجه زى دى

[size=32]عمدة كفر البهايم........ (اسكتش ساخر)
(طريقة عمل الفرعون؟)



بلدنا...
كفر البهايم....
تلقاها لما تركب قطر طريق مصر...وتنزل فى المحطة اللى حدا سجرة الكافور اللى نازله تغسل شعرها فى الترعه....هاتلقى حمارة عم بسطويسى... تركبها ...وهاتوصّلك طوالى على كفر البهايم
العمده ...
عمدة كفر البهايم......تلقاه قاعد دايما فى المندره
العمده يصقف : واد يا سرحان
ييجى سرحان جرى : نعمين ياحضرة العمده
العمده : شيعت لأبو المفهوميه زى ما قلتلك
سرحان : حصل يا حضرة العمده
العمده : أمال اتأخر كده ليه؟؟..
سرحان : خدمه تانيه يا حضرة العمده؟؟ تحب أقرالك الجرانين؟
العمده : تانى يا وش النحس ..ما كفايه الأخبار اللى زى وشك اللى صبّحتنى بيها على غيار الريق..سديت نفسى الله يسد نفسك
يالله امشى غور ..شيّع تانى لأبو المفهوميه خليّه ياجى بسرعه...هاتوا من تحت الأرض
سرحان : حاضر يا حضرة العمده
يروح جرى
ياحضرة العمده ...ياحضرة العمده
ينط العمده من على كرسى العموديه من خضته
هو انت يا بوز الإخص؟؟ جعزتنى ياللى تنشك فى بطنك
حمبولى العبيط ابن أبو بلطيه وست أبوها : الحقنى يا حضرة العمده
العمده : حصل ايه يا وله..انطق ... الزرع غرق ؟
حمبولى : ياريت يا حضرة العمده يا ريت
العمده : البلد ولعت ؟
حمبولى : ياريت ياحضرة العمده ياريت
العمده : الدوده كلت البهايم؟؟
حمبولى : ياريت ياحضرة العمده ياريت
العمده : أمال حصل ايه طلعت روحى
حمبولى بيعيط : اهئ .اهئ .اهئ شيخ الغفر ضربنى بالبلغه على راسى....ليه وليه بعتنى أشتريله بجنيه جبنه وبجنيه حلاوه قمت رجعت له من غير ما أجيب الجبنه والحلاوه
العمده : الله ينكد عليك يا بعيد ..وماجبتش الجبنه والحلاوه ليه يا حيله؟
حمبولى : اهئ .اهئ .أصل الفلوس وقعت منى
العمده : يعنى ضاعو؟
حمبولى : لا..لا ..مانى لاقيتهم تانى
العمده : امال ماجبتش الجبنه والحلاوه ليه؟؟
حمبولى : أصل الفلوس اتلخبطط قمت ما عرفتش الجنيه بتاع الجبنه من الجنيه بتاع الحلاوه اهئ ..اهئ
العمده بغيظ وهو بيخلع البلغه : كده ؟؟ شيخ الغفر ضربك على راسك بالبلغه ..وانى بقى هاضربك على قفاك
يجرى حمبولى بسرعه قبل ما ينضرب وهو بيعيط ويخبط فى أبو المفهوميه ...ويشتمه أبو المفهوميه : داهيه فيك وفى اللى مشغلينك
أما صحيح كفر بهايم
العمده : يا أهلا وسهلا يا سى أبو المفهوميه ....شاحوالك كده
أبو المفهوميه من طرطوفة مناخيره : إيوه يا عمده؟؟شيعتلى ليه؟
العمده : آآآآآآآه ..ياسى أبو المفهوميه ....دانى دماغى هاتوّج بعد الخبر اللى سمعته
أبو المفهوميه : خير يا عمده ؟
العمده :آل ايه...الحكومه عاوزه تخلى العموديه بالإنتخابات
أبو المفهوميه : ياراجل ...دى اشاعات
العمده : لا مش اشاعات...الوله سرحان قرالى الخبر النهارده الصبح فى الجرنان
أبو المفهوميه : يبقى كلام جرايد...
العمده : مانى كنت فاكر كده ...لحد ما جتلى الأوامر من المركز
آل ايه....هايسمحوا للناس ترشح نفسها وتعمل دعايه وبلاوى وتروح الناس تنتخب اللى همه عاوزينه.......
وغطينى وصوّتى يامه
أبو المفهوميه : أنا مش فاهم انت قلقان ليه يا عمده ؟ هوّ حد هايرشح نفسه غيرك؟..داكلهم بهايم
العمده : لهو انت مادرتشى؟؟الحكومه عامله نظام تانى ...اللى يرشح نفسه يدوله عشر تلاف جنيه علشان يصرف على الدعايه والقماش والعزايم والذى منه
أبو المفهوميه : الله الله الله ..ليه كده يا عمده ؟ ده كده ممكن البهايم تطمع فى الفلوس وحد يوزه الشيطان ويرشح نفسه...دى الحكومه قالبه عليك خالص ياعمده...انت عملت ايه؟؟
يفكر أبو المفهوميه : لكن ولا يهمك ...طول مانا معاك ..اوعى تشيل هم..محلوله ان شاء الله
وبعدين انت خايف من ايه ؟البلد فى جيبنا ..والبهايم بتوعنا
وتبقى أمه داعيه عليه اللى يرشح نفسه قدامك
اسمع ..أول حاجه ...تطلق الواد خليل الموقعاتى عليهم ...خليه يدوّر الإشاعات فى البلد ويفكرهم بحسنين أبو حطب اللى اختفى من سبع سنين...ولقوا جتته عايمه على وش الترعه
العمده يفرح : ايوه...ايوه...ولا سليمان أبو الوفا ...اللى انطس له خمسه وعشرين سنه فى قضية حشيش أونطه
أبو المفهوميه : مانت واخد بالك أهه يا عمده...بقى معقول بعد دا كله حد حايقدر يقف قصادك؟؟
العمده : ياسلام عليك ياسى أبو المفهوميه ...أما عليك دماغ ..تتاقل بالدهب
العمده يفكر : طب والبهايم ..لو حد منهم اتكلم ؟؟ ولا العيال اللى معاهم شهادات ؟؟ لو حد فيهم رفع صوته؟
أبو المفهوميه : ماحدش فيهم ممكن يرفع صوته
طول ماهمه عوطليه ومالطوعين عالقهوه طول النهار...وطول ما قهوة عزوز مفتوحه...والدش شغال فيها طول النهار...وآخر الليل ..الحشيش وأفلام الفيديو اللى بالى بالك شغاله على ودنه .....مش هايلاقوا وقت يفكروا ..ولا صحه يرفعوا صوتهم.....
وان كان ده ما يكفيش ....نعملهم مولد
العمده : مولد؟؟ مولد ايه؟؟
أبو المفهوميه : أى مولد والسلام ...ان شالله نبنيلهم مقام فى أى خرابه ونقولهم ده واحد من الواصلين...نقول دا مقام سيدى المفتوش
بس ..ونعملهم المولد أربعين ليله ...ونبعت نجيب لهم الغوازى من البندر...يفرفشوهم ويرقصوهم ...
العمده : براوه عليك ياسى أبو المفهوميه ...ياسلام عالدماغ النضيفه
أبو المفهوميه : وان حد بعد كده فكر ولا اتكلم ...نخلى حسب الله شيخ الغفر يتقّل العيار عليهم ....هايمشوا يكلموا نفسهم
العمده : الله ...الله ..عليك ..بالك لو الحكايه دى عدت على خير ...لهاتشوف منى اللى عمرك ماشوفتوا
وله ياسرحان ...انت ياوله
سرحان ييجى جرى : نعم يا حضرة العمده
العمده : هم ياوله....علق الإعلان ده فى البلد
سرحان : اعلان ايه ياحضرة العمده؟
العمده : اعلان عن اللى عاوز يرشح نفسه فى الإنتخابات....يتقدم حدانا ويسجل اسمه.......
ويبقى يقابلنى .......
.................................................. ............
وفى قهوة عزوز............
حجازى وحموده اتنين شباب متخرجين من الجامعه عواطليه ضاربهم السلك...طول النهار عالقهوه يشربوا شيشه ويلعبوا طاوله وكوتشينه
حموده : شفت الإعلان اللى علقه الواد سرحان فى القهوه؟؟
حجازى : مش بتاع الإنتخابات ؟...يا عم سيبك ...تلقاه طعم من العمده ..يصطاد بيه اللى بيعارضه
حموده : لا لا دا الحكايه بينها بصحيح...بيقول ان اللى هايرشح نفسه الحكومه هاتديله سبع تلاف جنيه لزوم الدعايه
حجازى : ايه ايه؟؟..قلت ايه؟؟ سبع تلاف !!
بقى العمده بتاعنا ده هايدى المرشحين سبع تلاف ...ليه؟؟ هى الحدايه بتحّدّف كتاكيت!!
حموده : ده مش هوّه دا الحكومه
يرفع حجازى حواجبه ويفكر : الحكومه ؟؟ هى الحكومه قلبت عليه ولا ايه؟
حموده : حجازى ....بتفكر فى ايه؟؟
حجازى : والله بينها هاتسلك ...انت قلت سبع تلاف؟؟
ماشى ياعمده ..أهى جاتلى عالطبطاب
حموده : بينك اتجنيت ..عاوز ترشح نفسك يا حجازى؟
حجازى : ليه هو أنى حمار؟؟...علشان الرصاصه اللى طاشت السنه اللى فاتت ..تصيب المره دى وأعوم على وش الترعه؟
حموده : أمال ناوى تعمل ايه؟
حجازى : ايه رأيك ..لونضرب عصفورين بحجر واحد؟........ ناخد الفلوس...ونزغزغ دماغ العمده؟ونخليه ماينامش الليل
حموده : ازاى؟؟
حجازى : نطلعها فى دماغ واحد من الكفر ...أى واحد ..ونخليه يرشح نفسه قدام العمده
حموده : يا حلاوه ..ومين ده اللى هايرضى يعمل كده؟؟
حجازى : أى واحد ...دا كلهم بهايم
حموده : بهايم آه ..لكن مش مجانين...مين ده اللى هايرضى يناطح العمده ويستحمل أذاه؟؟..الا اذا كان أهبل...تعرف واحد أهبل؟؟
يامعلم عزوووووووووووز ...أمى بتقولك عاوزين تلاته متر جاز
حموده وحجازى تطلع عينيهم على حمبولى الغلبان اللى دخل القهوه ساعتها فى الوقت ده ...لقضاه
.................................................. ...
وفى بيت حجازى .............
حجازى : فهمت يا حمبولى؟
حمبولى : لا
حموده : داحنا واقعتنا سوده معاك
حجازى يضربه على قفاه : بقالنا تلات ساعات بنفهم فيك وبرده مش فاهم؟؟ دانت مخك ضلم
حموده : ماتشوفلك واحد تانى
حجازى : مافيش حد غيره هايرضى يعمل كده
حمبولى ...فتح مخك معايا...بكره الصبح حاتيجى معايا المركز وتقول لهم........ أنى عاوز أبقى عمده
حمبولى يفرح : وأقعد فى المندره على كرسى العمده؟؟
حجازى : وهاتلبس العبايه واللاثه كمان...وهاتاخد فلوس كتير وكل الكفر هايسمع كلامك ويبوس ايدك...اتفقنا؟؟
حمبولى : ياحلاوه ...هابقى عمده ....ولا حدش فى الكفر هايستجرى يضربنى على قفايه تانى
حجازى : حلو آديك فهمت...ودلوقتى ...هاتختارالرمز بتاعك ايه؟
حمبولى : يعنى ايه؟
حجازى : يعنى التصويره اللى هانحطها جنب صورتك والناس تعلمك بيها
حمبولى : ايوه ايوه مانى فاهم ...هو أنى حمار؟؟
هاختار ......................الشبشب
حجازى يلزقه على قفاه : ايه ؟؟؟الشبشب يابن ال....
حمبولى : ايه دى .....انت بتضرب العمده؟؟ طب والله مانى لاعب
حجازى : استنى ..استنى...طب والله رمز حلو
حموده : الله يخرب بيتك يا حجازى....دانت نويت تهلهل العمده وتمسخره وتجيب له نقطه
حجازى : أحسن ...مش فاكر اللى عمله فينا
انما اشمعنى الشبشب يا حمبولى؟؟
حمبولى : أصل أمى كل يوم تضربنى بيه..... وانت بقى ماتعرفش شبشب أمى حنين قد ايه
حجازى : يافرحة أمك بيك....بينا عالمركز علشان نقدم الأوراق
حموده : وتفتكر هايوافقوا عليه؟؟ دا عبيط
حجازى : طبعا هايوافقوا....مش كل الشروط موجوده....سنه عدى الخمسه وتلاتين ..ومن الكفر أبا عن جد...وبيعرف يفك الخط
مش دى شروطهم...
حموده : الحمد لله انهم ماطلبوش يكشفوا على دماغه
خد بالك ...لو العمده عرف هايطينها على دماغك
حجازى : لا...على مايعرف أكون أنى هجيت من البلد كلتها ...أمال أنى عاوز الفلوس ليه؟...يالله عالمركز....
حموده : استنى ......ومانقدمش الورق هنا ليه؟
حجازى : انت عاوز العمده يطخه الأول ..وبعدين ياخد منه الورق؟ ؟..كده هايبقى متسجل عند الحكومه انه رشح نفسه قبل العمده ما ياخد باله...
...............................................
فى بلدنا كفر البهايم لف ودار الكلام .............
آل ايه ...الواد حمبولى العبيط حط راسه براس العمده ورشح نفسه فى الإنتخابات
وناس تقول : يوه يا ندامه ...ينيلك ياواد ياحمبولى ...عاوز يعمل راسه براس العمده
وناس تقول دا عبيط وغلبان...ياعينى عليه دا العمده هايدوسه بجزمته زى الخنفسه
أما الشيخ عبد الواحد امام الجامع لما سألوه عن رأيه قال : بلا مسخره وقلت قيمه ...خلاص ...عليه العوض فى البلد دى
الناس واقفه تتفرج والبلد بتخرب
والله ده غضب من ربنا
احنا اللى نستاهل علشان ساكتين
واحد يسأله : طب ماترشح نفسك انت يامولانا...على الأقل انت الناس هاتنتخبك علشان حافظ كتاب ربنا ...ويعنى ان سقطت ..هاتبقى خدت الفلوس
الشيخ : اخرس يا فاسق ...فاكرنى من طلاب السلطه ولا المال ...حاش لله
أنا من طلاب الآخره
واحد تانى : أمال نعمل ايه فى المصيبه اللى حطت على دماغ البلد دى يا عم الشيخ؟؟
الشيخ : أحسن حاجه بعد صلاة الجمعه نصلى ركعتين ونستغيث ربنا يرفع الهم والغم والمصايب عن بلدنا
ولما لف الكلام ودار ...وصل لودان العمده
وكانت سنه سوخه على دماغ حمبولى ابن أبو بلطيه وست أبوها
وجرجروه عالمندره وضربوه لما عدموه العافيه
والعمده علقه فى الفلكه لما ورّم له رجليه
العمده : بقى انت يابن أبو بلطيه يا مدهوّل...يا عبيط..يابو مخ مليان تراب .تعمل راسك براسى وتمهزأنى وسط البلد؟
حمبولى : أبوس رجلك ياحضرة العمده ...حرمت ...
العمده : وآدينى بعت أجيب اللى وزك وطلعها فى مخك ..شوف هاينفعك بإيه..لما أ طخك عيار وأسيب الديابه تنهش فى جتتك
أبو المفهوميه : لا ...لا.يا عمده
دم لأ..خلاص..ده بقى فى حمى الحكومه من ساعة مارشح نفسه وأى حاجه هاتجراله أكيد هايتهموها فيك ..لأنك صاحب مصلحه فى أذيته
العمده : آآآآآآآآآخ متغاااااااااظ ...بس لما يقع تحت ايدى الكلب اللى اسمه حجازى
سرحان : ياحضرة العمده...الواد حجازى طفش من البلد
العمده : ايه ..بتقول ايه ياغراب البين انت...هو انت ماتخشش عليا بخبر يبل ريقى أبدا جتك البلاوى وش نحس
سرحان : والوليه ست أبوها مراة أبو بلطيه..أم الواد حمبولى عامله مناحه قدام المندره وبتعيط على ابنها
ولمه حواليها شوية نساوين عمالين يندبّوا
العمده : وبعدين ؟؟أعمل ايه ياسى أبو المفهوميه؟
أبو المفهوميه : خلاص ياعمده ..لازم تسيبه..الإنتخابات بعد أسبوع والشوشره مش فى مصلحتك دلوقتى..وماتخافش منه..داحتة واد عبيط ..واللى كان بيحركه طفش وهو لوحده مافيش منه خوف
العمده : قولى يا سى أبو المفهوميه... عندى سؤال عمال ينقح عليا ويبرم فى صواميل نافوخى ...ليه مارشحتش نفسك للعموديه؟؟
أبو المفهوميه : جرى ايه يا عمده ..انت خايف منى ولا ايه؟؟
على العموم ماتخافش ..دى مش لعبتى..أنى مش ممكن أدفن دماغى ومواهبى وامكانياتى فى منصب عمده...أنا أكبر من كده بكتير
المهم دلوقتى سيبه قبل الناس ما تكتر قدام المندره
العمده : ماشى ..لكن لازم يتأدب...احرقوله العشه اللى عايش فيها علشان مايستجريش بعد كده يعمل راسه براس أسياده
..............................................
تتلم الناس علشان تتفرج على غفر العمده وهمه بيحرقوا عشة حمبولى
ولما النارتشعلل ..................
ياااااااااااالهوتىىى...الحقووووووووونىىىىى
يانبويه ...ياضنايا...البت كانت بتلعب حدا عشة حمبولى
كل الكفر يصوّت : طفوا الحريقه..طفوا الحريقه...
يا نبويه....البت جوه العشه....حد ينجدها يا ناس
ييجى حمبولى من آخر الدنيا جرى وجلابيته فى سنانه وينط جوه العشه والنارقايده ومشعلله فيها..
وبعد شويه.........
يخرج حمبولى من وسط النار صاغ سليم والبت نبويه فى ديله
ويزغرد الكفر كله ...ويسقف له
ويشيلوا حمبولى اللى رمى نفسه فى النار علشان ينجّى البت نبويه
يشيلوه على كتافهم ويلفوا بيه البلد كلها وهمه بيهتفوا :
أبو بلطيه أبو بلطيه رمز الشبشب يا أفنديه
أبو بلطيه أبو بلطيه رمز الشبشب يا أفنديه
وبعد ما كان الواد بينضرب بالبلغ ....بقى هو دلوقتى اللى عالحجر
أبو زيد الهلالى اللى هاينجد الكفر ويخلصه من العمده المفترى
.........................................
وياجى يوم الإنتخابات ..
وتتملى البلد ناس أغراب من البندر والجرانين والتليفزيون ياجوا يصوروا الإنتخابات..ويتحدت العمده فى التلفزيون
المذيع : عرفنا ياعمده ان الحكومه بعتت مندوبين ومراقبين علشان يراقبوا الإنتخابات ومايحصلش تزوير
العمده ياجوا أهلا وسهلا ..احنا معندناش حاجه نخبيها..وكل شغلنا على نضافه...الإنتخابات عندنا نضيفه نضيفه ..أنضف من غسيل الوليه أم جابر الغساله
المذيع : وايه الضمان ان الإنتخابات تفضل نضيفه؟؟
العمده : الوليه أم جابر بذات نفسيها ..وادينى شيعت أجيبها من دارها وهاتفضل معانا لحد اعلان النتيجه
المذيع : بلغنا انك رفضت تستعين بالحبر الفسفورى ...ياترى ليه؟
العمده : أنى مش ممكن أقلد حد....وبعدين الحبر الفسفورى ممكن يتغش...لكن الحمد لله ..احنا اخترعنا أحدث طريقه لمقاومة الغش فى الإنتخابات
المذيع : طريقة ايه؟
العمده : الجله
المذيع : مين ؟؟
العمده : الجله...لكل مواطن قرص جله..ولما ياجى اللجنه ينتخب ندرمغه بقرص الجله علشان يبقى معروف من ريحته انه خلاص انتخب...يقوم مايهوبش ناحية اللجنه تانى..لاتقولى بقى لاحبر فسفورى ولا غيره..لأن ريحة الجله بتقعد فى الجته عالقليل اسبوعين تلاته
المذيع : أيوه ..أيوه ..شامم...شامم...عن اذنك
كان معكم عجلان أبو الروس فى تغطيه شامله للإنتخابات
من أمام زريبة عمدة كفر البهايم
..........................................
الناس كلتها كانت مبيته على بعضيها أديلها ليله واتفقوا يوقعوا العمده ويخرجوه من الإنتخابات قفاه يقمّر عيش........
عنها والناس وقفت تحرس الصناديق بالشوم والنبابيت
والغفر ماستجروش يمدوا ايديهم على الصناديق
والأصوات نازله ترف على ابن أبو بلطيه
وآخر النهار ....
قامت عركه للسما ...مابين غفر العمده وأهل الكفر
آل ايه...الغفر عاوزين يشيلوا الصناديق ويحملوها على أوترومبيل العمده كده هوه عينى عينك..ويعدوها من تحت شنب أهل الكفر
لكن الناس قعدت واستربعت فوق الصناديق ...ويامين يادى الجدع يقدر يزحزحهم..
واتعترس في العركه ناس يامه ...خليل وزيدان ومتولى ...وغيرهم كتير....
ولما الفجر طلع ..طلعت معاه النتيجه
وعملها ابن أبو بلطيه وست أبوها
واتعلقت التعاليق واندبحت الدبايح وباتت البلد كلتها فى فرح تلات ليالى
والواد حمبولى بقى العمده...
وقعد فى المندره على كرسى العمده ...ولبس اللاثه والعبايه
والباب يخبّط .....ويدخل.....
العمده : يامرحبتين يا مراحب
نوّرت يا أبو المفهوميه
أبو المفهوميه : شيعتيلى ليه يا عمده...خير؟أكيد علشان تشكرنى على اللى عملته معاك
العمده : اههى...هو اللى انت عملتوا شويه؟؟
دانت خدمتنى خدمة العمر ....لما زرتنى بعد الحريقه بليله وفطمتنى على الحدوته من أولها لآخرها وعلمتنى ألعبها ازاى...دا لولاك كنت فضلت على غمايه
أبو المفهوميه : آه ..لازم علشان أهل الكفر بيشتكوا من قلة الميّه
العمده : لا ...مية ايه؟؟مانى حلتها خلاص ..وقفلت عليهم الميه
أبو المفهوميه : يبقى لازم حجازى ظهر تانى
العمده ..لا حجازى ده حبيبى ...دانى أكرمته آخر كرم ..ومش ممكن عاد هايظهر تانى..ولا حتى على وش الترعه
أبو المفهوميه : يبقى حسب الله شيخ الغفر القديم عاملك مشاكل
العمده : لا. لا. لا . ما خلاص ..بعته يشيل الجله ويترب تحت البهايم
أبو المفهوميه : يبقى البهايم عملت حاجه؟
العمده : وهمه يقدروا يعملوا حاجه بعد ما صوتوا عليّه واختارونى بذات نفسيهم؟
أبو المفهوميه : أمال عاوزنى فى ايه يا عمده ؟
العمده : علشان انت حبيبى .وخدمتنى خدمة العمر ..أنى عاوزك معايه هنا
أبو المفهوميه : ما أنا معاك أهه يا عمده
العمده : لا . لا . مش كده ...أنى عاوزك تقرالى الجرانين وتشتريلى الدخان كل يوم
أبو المفهوميه : ايه ؟؟ أنا أشترى دخان؟ انت مش عارف أنا مين؟؟
العمده : انت حبيبى ... وانا لازمن أطمن انك هاتلعب دايما معايا مش عليا
وخلى بالك ...اللى ييجى عليا عمره ما يكسب أبدا ...فاهمنى؟؟
ها ...قلت ايه ؟؟
أبو المفهوميه : أنى بس كنت عاوز أعرف حاجه؟
انت ازاى رميت نفسك فى النار علشان خاطر البت نبويه؟
العمده : هأ هأ هأ ..نبوية مين يابهيم...
دانى كنت داخل أدوّر على التلاته جنيه اللى كنت فايتهم تحت الفرشه اللى بنام عليها
هاهاهاهاهاهاهاهاهاهاهاهاهاهاهاهاهاهاهاهاهاهاها

[/size]


الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://mazroo.ba7r.org
صلاح
Admin
avatar

عدد المساهمات : 436
نقاط : 1001
تاريخ التسجيل : 07/11/2009

مُساهمةموضوع: رد: محتاجه حد يساعدني   الأحد مارس 13, 2016 5:45 pm

وفيه حاجه زى كده بس محتاجه إعداد

أسكتش صعيدى فى الملكوت

بشرى : سيداتى سادتى أهلاً ومرحباً بكم فى حلقة جديده من برنامجكم الجديد (من سيربح الملكوت ) ويسعدنى فى هذه الحلقة أن نستضيف الأستاذ أبو سويلم من قرية نجع القط محافظة الجيزة

يدخل أبو سويلم وهو مبسوط ومنبهر ومعه زوجته مبروكه ومعهم كيس من الخيار

بشرى : أهلاً وسهلاً بك يا أستاذ أبو سويلم
أبو سويلم : هاى هاى شايفة يا بت بقيت أستاذ علشان تروحى تقولى لأبوكى والناس البلد كلاتهم
مبروكة : أيه مش كمان حدت
أبو سويلم :
بشرى : لو سمحتكم يا جماعة مش كده أحنا على الهوا
أبو سويلم : أتى تى تى هوا هوا هوا أيه ده كمان أللى أنت تقولى عليه

قومى يابت من على الهوا

مبروكة : وحياة أمك يا خوى اللى كل يوم بتصبحنى وتمسينى بسباطتين انى ما قاعده على حاجه
سويلم : أنتى طاب عارفه .......
بشرى : (بعد مقاطة أبو سويلم ) بتقول : أيه ده أيه ... حرام عليكم عاوزين نقدم الحلقة دى
أبو سويلم : ينظر إلى مبروكة ... طاب ماشى لما نروح
بشرى: مع السؤال الأول: - ورد فى المزمور الــ 50 " تغسلنى ......... أكثر من الثلج
(أبيض – أحمر – أخضر – أزرق )
أبو سويلم : يابت لما الثلج يتغسل يبقى لونه أيه ؟
مبروكة : الثلج لو عليه غناب يبقى لونه أحمر ولو عليه( .....) يبقى لونه أزرق . بس مش عارفه لادى ولادى
سويلم : أنا حاسس أنك هتودينى فى داهيه . بس أنا حاسس أنها هى الأولنيه .. هى أسمها أيه الأولنيه
بشرى : أسمها أبيض
سويلم : أيوه أيوه هى دى ..... أمبيض ذى الثلج .. أنا فاكر المسجل قالها كده .
بشرى : جواب نهائى
سويلم : أيوه .... أيوى يابوى أحنا كلمتنا واحده.
بشرى : طيب طيب .. الأجابه صحيحه تاخد عليها نقطتين .
سويلم : نقطتين أما يلهفوكى .... النقطتين دول خليهم ليكم ... أحنا عاوزين قرشين علشان العيال .
بشرى : ما أحنا بنجمعهملك وندهملك على بعضهم .

أطمئن يا أبو سويلم
أبو سويلم : زغرتى يابت يا مبروكة
بشرى : والأن مع السؤال الثانى : ورد فى الأنجيل " غيرة ......... أكلتنى "
( بيتك – مدرستك -0 وزتك )
أبو سويلم : يابت مين فى اللى قالتهم دول بياكل ؟
مبروكه : مفيش غير الوز اللي بياكل يا خوي
سويلم : طاب ازاى بس الوز ممكن ياكلنى ؟
بشرى : يا ستاذ أبو سويلم الأنجيل مش بيقصد الأكل الجدى
مبروكة : يا أبو سويلم يا أبو سويلم عرفتها..... عرفتها يا بوي هى الأولنيه ...
أبو سويلم : هى الأولنية
بشرى : بيتك
أبو سويلم : أيوه هى دى غيرة بيتك أكلتنى .. أنا سمعتها على المسجل كده .
بشرى : جواب نهائى .
سويلم : اه اه أنتِ باين عليك عاوز تنضرب يابوى أحنا كلمتنا وحده
بشرى : خلاص أجابه صحيحه ... عليها نقطتين .
سويلم : زعرتى يابت .
بشرى : والأن مع السؤال الثالث : كم عدد أسباط بنى أسرائيل
( 12.5- 12 - 13.5- ¼14 )
أبو سويلم : أسباط يعنى أيه – أسباط - تعرفى يا بت
مبروكة : وحيات أمك ما أعرف يا بوي
بشرى : على فكرة أنتَ لك أختيارات
سويلم : وأيه هما الأختيارات ؟
بشرى : ( حزف أجبتين – الأتصال بصديق – رأى الشعب)
سويلم : طاب شيلنا منهم أثنين
بشرى : يبقى معاك عدد الأسباط ( 12.5 – 12 )
سويلم : تعرفيهم يا بت ؟
مبروكة : هما 12 يا بوى على عدد الوزات اللى عندينا فى البيت
أبو سويلم : طيب متقوليش ليه 12.5 علشان الوزه الى فقشت أمبارح .
مبروكه : اه صح يابوي
سويلم : أقولك أتصل بالعمده اللى فى البلد .
مبروكة : ده هو الوحيد اللى متعلم ومتنور فى البلد والنجع كلاتها .
بشرى : ترن ترن – نجع القط ... معكم الأستاذ أبو سويلم
سويلم : ألو ألو مترد يأخي .. ألو يا عمده .
العمده : ألوه مين معاى .... البندر مصر
بشرى : ألوه يا عمده معاك " برنامج من سيربح الملكوت " وبلدياتك الأستاذ أبو سويلم عاوز يستشيرك فى موضوع
العمده : أبو سويلم بقى أستاذ .... أنا هدبحله معزتين وجديين وخروفين . وفين لما ييجى .
أبو سويلم : ألو يا عمده .. عامل أيه وعامل أيه النجع عنديكم
العمده : يسلموا عليك وبيشوفوك على التلفزيون ... بس عوز أقلك على حاجه ..
أبوسويلم : حاجة أيه يا عمده
العمده : الجاموسه بتاعتك ..... (قطع الحديث )
سويلم : مالها يا عمده
العمده : ولدت وجابت جاموس صغير الخالق الناطق أنت
سويلم : بت يا مبروكة زغرتى يا بت
ده الجاموسة ولدت وجابت جاموس صغير
الخالق الناطق أنا – أبوك العمده بيقولى
مبروكة : يا حلاوه يولاد ... خليهم يخلولى حتت سرسوب .
أبو سويلم : اه أنا عارفك همك على بطنك .
العمده : ألوه / أبو سويلم / أيوه يا عمده
العمده : وعارف كمان المعزه اللى ......... ( فجأه الخط قطع )
أبو سويلم : " الو الو يا عمده ... كلمنى على الفودافون
بشرى : خلاص الوقت أنتهى
أبو سويلم : خلاص أيه خلصت روحك . بت يا مبروكة
مبروكة : نعمين يا خوى .
سويلم : عرف المعزة اللى جابتهالك أمك نهار ما تجوزتك .
مبروكة : يالهوى يالهوى مالها يا خوى ؟
سويلم : مش عارف يابت جرالها أيه .... أبوك العمده ما كمليش .
مبروكة : بامر يامرى .... المعزة جرالها أيه .
بشرى : ( بنرفزه وعصبيه ) أحنا مش فى المعزه أحنا فى السؤال ؟

كم عدد أسباط بنى أسرائيل 12.5 ولا 12؟

أبو سويلم : بقولك هما 12.5 – لأنه كان معاهم واحد صغير بيتحسب نص نفر
بشرى : جواب نهائى
سويلم : علىّ بالطلاق أنتِ رايح تنضربى أنهرده أحنا كلمتنا واحده يابوي
بشرى : خلاص أجابه ( يقطعه أبو سويلم )
أبو سويلم : زعرتى يا بت
بشرى: الأجابة خاطئة هما 12 سبط بس
أبو سويلم : ليلتك طين – صوطى يا بت
بشرى : يا جماعة أهدو خلى بالك من السؤال الرابع
س: أمراءه لم تدفن هى ؟
( أمراة أسماعيل – أمراة أبراهيم – أمراة أسحق – أمراة لوط )
أبو سويلم : لم تدفن : أمال راحت فين يا خوي ... أمال أكلها الوز
بشرى : برده وز تانى – يعنى لم تدفن فى قبر
مبروكة : بس ... بس قصده دفنت فى البحر .
بشرى : لو فى البحر ... أسمها غرقت والسمك كلها – سمك القرش تاكلكم أنتم الأثنين وتريحونى .
أبو سويلم : صح يا بيت – أنت متنور ... وعارفه .... وبرضه أنا متنور وعارف تبقى أدفنت فى الرملة .
بشرى : يا أستاذى لم تدفن يعنى ... أسهلهالك صارت عمود ملح .
مبروكة : بس بس أمرأة لوط – أصلى محدش راح عزى فيها
بشرى جواب نهائى
أبو سويلم : أنتِ زودتيها قوى يا بوي وشكلك مش هتعدى الليلة دى على خير ( يقف أبو سويلم ويقول ) يصح يا مبروكة الوليه تموت ومحدش يروح يعزى فيها

يادى الكسوف أمال أحنا كنا فين

بشرى : خلاص نحسبها أجابة صحيحة ... يبقى كده عندكم ستة نقط .
سويلم : برضه نقط ...أحنا عاوزين قرشين . طب زغرتى يا مبروكة
بشرى : أحنا مجمعهملك و نديهملك على بعض . شكلك مش هتاخد حاجه وتقلبها غم .
أبو سويلم : عما تقول أيه .
بشرى : أهدى وخليك مع السؤال الأخير

تزوج أبينا أبراهيم كم زوجة ؟

أبو سويلم : ( يقاطع بشرى ) أثنين يا بوي أثنين
بشرى : خذ السؤال والجواب ... تنين عما يلهفك
تزوج أبينا أبراهيم كام زوجة ( واحدة – ثلاثة – أربعة – خمسة )
( سكوت من أبو سويلم )
مبروكة : ده مفيش أثنين
أبو سويلم : هو أبينا أبراهيم تجوز أكتر من أتنين أياك
مبروكة : ما أنت لو قارى الكتاب المقدس أو متنور كنت عرفت كام واحده تجوزها
أبو سويلم : أنا عارف هاجر وسارة ( سارة أنجبت أسحق وهاجر أنجبت إسماعيل )
بشرى : يا سلام عليك يا أبو سويلم ده أنت متنور بس ناقصك الكهرباء
مبروكة : الكهربه وصلت النجع كلاته
أبو سويلم : البيت تقصد كلمة الله تنور فينا علشان السيد المسيح قال أنتم نور العالم النور هو عملنا وهو برضه قال أنا نور العالم
بشرى: على فكرى قاعدلك رأى الشعب (الخدام )
أبو سويلم : ناخد رأى الشعب ( الخدام ) شكلها كده مش هناخد لا نقط ولا برشام – صوتى يابت
بشرى : على مهلك ده أخر سؤال ... يعنى لم مجوبتهوش مش هتاخد حاجه ... ولو جاوبته هتاخد جائزتك
مبروكة : ممكن أسأل( .......) الداية هى ممكن تعرف
سويلم : ( يقولها وهو محتار ) وقت السؤال قرب ينتهى .
بشرى : ممكن تستعين بالشعب ( الخدام )
سويلم : شعب مين يا بوي هو حد قاعد معانا أيالك
مبروكة : الناس اللى جاية تحضر ( الحفلة )
سويلم : أيه رأيك يا مضروكه .
بشرى : يا خبر أبيض الراجل نس أسم امراته
سويلم : ما أنتِ سؤلك محيرنى يا بوي لو الواد بخاته هنا كان حل السؤال ده علشان أبوه متجوز أكتر من خمسه .
مبروكة : دى السؤال ده فى الكتاب المقدس
بشرى : خلاص الوقت أنتهى وخسرتم الجائزة يلى ياعم تقوم تروح

تقفل الســــــــــــتـــــــــــار[/center


الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://mazroo.ba7r.org
Nody



عدد المساهمات : 3
نقاط : 5
تاريخ التسجيل : 08/03/2016

مُساهمةموضوع: رد: محتاجه حد يساعدني   الأحد مارس 13, 2016 8:32 pm

اولا بشكر حضرتك جدا علي مجهودك وتعبك بس للاسف مش هتنفع علشان المفروض تكون مواقف ف المدرسه ودي ملهاش علاقه
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
محتاجه حد يساعدني
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى التربية المسرحية :: نصوص مسرحية-
انتقل الى: